lock search attention facebook home linkedin twittter

Ekki taka gömlum sannleik sem gefnum. Það þarf kjark til að líta hlutina nýjum augum og fá á þá ferska sýn.

Capacent og H&M gera samkomulag um ráðningar

Capacent og H&M hafa gert samstarfssamkomulag um ráðningar starfsfólks fyrirtækisins á Íslandi en H&M hefur rekstur tveggja verslana í Smáralind og Kringlunni í haust.

Fyrsta skrefið er að ráða stjórnendur H&M fyrir verslanirnar hér á landi og er stefnt að því að ráða í á þriðja tug stjórnunarstarfa í janúar og febrúar auk útstillingarfólks.  Um er að ræða stöður verslunarstjóra, deildarstjóra, rekstrarstjóra og markaðs- og upplýsingafulltrúa auk útstillingarfólks.

Þeir stjórnendur sem nú verða ráðnir munu hefja störf í apríl og/eða maí og verða þá sendir í þjálfun erlendis. Þeir munu svo taka þátt í uppsetningu og opnun nýju verslananna.

Síðar á þessu ári verður ráðið í önnur störf í verslunum H&M en alls er stefnt að því að ráða um hundrað til hundrað og fimmtíu einstaklinga í störf hér á landi.

H&M er með yfir 4000 verslanir á 64 mörkuðum og alls starfa um 160 þúsund hjá fyrirtækinu.

„Við erum stolt af því að vera samstarfsaðili H&M á Íslandi í ráðningum, verkefnið er umfangsmikið og mjög spennandi. H&M er einstakt fyrirtæki og innkoma þess á íslenskan markað skapar gríðarleg tækifæri fyrir þá sem hafa áhuga á tísku og rekstri verslana, ekki síst þar sem H&M leggur ríka áherslu á þjálfun starfsfólks og möguleika þess á að þroskast og þróast innan fyrirtækisins. Ef fólk hefur áhuga og metnað getur starf hjá H&M á Íslandi leitt til starfsframa innan H&M samsteypunnar um allan heim.“ segir Jakobína H. Árnadóttir, hópstjóri ráðninga hjá Capacent.