lock search attention facebook home linkedin twittter

Ekki taka gömlum sannleik sem gefnum. Það þarf kjark til að líta hlutina nýjum augum og fá á þá ferska sýn.

Capacent í Svíþjóð og Capacent á Íslandi sameinast

Capacent í Svíþjóð og Capacent á Íslandi hafa sameinast með kaupum þess fyrrnefnda á meirihluta hlutabréfa í Capacent á Íslandi. Stefna félagsins er að vaxa með jafnt innri vexti sem og fjárfestingum. Kaupin á Capacent á Íslandi eru liður í því að styrkja stöðu félagsins á Norðurlöndum.

„Við teljum Capacent á Íslandi eiga mörg sóknarfæri við núverandi aðstæður og munum vinna með félaginu að því að stækka og auka arðsemi sína. Við sjáum sömuleiðis margvísleg samlegðaráhrif við þessi kaup og að félögin geti sameinað krafta sína, mannauð og þekkingu þegar við tökumst á við stærri verkefni,“ segir Edvard Björkenheim, framkvæmdastjóri Capacent í Svíþjóð.

„Fyrir Capacent á Íslandi felast mikil tækifæri í því að vera nú hluti af norrænu ráðgjafafyrirtæki með starfsemi í þremur löndum og þetta styrkir stöðu okkar á markaði verulega. Þessi félög þekkjast vel, við höfum áður starfað saman innan sömu samstæðu og notað sameiginlegt vörumerki í tæpan áratug.  Við deilum jafnframt sömu gildum og sýn auk þess sem félögin bæta hvort annað vel upp þegar horft er á lausnaframboð þeirra,“ segir Halldór Þorkelsson framkvæmdastjóri Capacent á Íslandi.

Capacent Holding AB í Svíþjóð var upphaflega stofnað árið 1983 sem hluti af alþjóðafyrirtækinu ABB og hefur verið skráð á Nasdaq First North-markaðnum í Stokkhólmi frá árinu 2015. Félagið hefur skrifstofur í Svíþjóð og Finnlandi og hjá því starfa um hundrað sérfræðingar. Capacent hefur sterka stöðu sem norrænt ráðgjafafyrirtæki og er leiðandi sem slíkt á mörgum sviðum.

Hjá Capacent á Íslandi starfa um 50 ráðgjafar að greiningu, mótun og innleiðingu margvíslegra lausna á sviði stefnumótunar, stjórnunar, ráðninga, rekstrar-, fjármála- og upplýsingatækni.