lock search attention facebook home linkedin twittter

Ekki taka gömlum sannleik sem gefnum. Það þarf kjark til að líta hlutina nýjum augum og fá á þá ferska sýn.

Hagnýt ráð fyrir umsækjendur Vinna.is

Mikilvægur liður í því að kynna sig og koma sér á framfæri er að setja upp greinagóða og vandaða ferilskrá og oftast er einnig farið fram á að umsókn fylgi kynningarbréf.

Ferilskrá

Ferilskrá er til þess gerð að kynna einstaklinginn, skýra frá menntun, reynslu, áhugamálum og félagsstörfum. Það er því mikilvægt að ferilskrá sé vel unnin. Hæfileg lengd á ferilskrá er 1-2 blaðsíður.

Það sem koma þarf fram á ferilskrá:

  • Persónulegar upplýsingar.
  • Menntun og starfsreynsla, eftir tímabilum.
  • Tungumála- og tölvukunnátta.
  • Umsagnaraðilar.
  • Mynd af umsækjanda – frjálst val. Rétt er að benda fólki á að hafa viðeigandi mynd.
  • Vistið ferilskrár undir nafni og kennitölu.

Það sem ber að varast:

  • Of mikinn orðaflaum – hafa heldur stuttar og hnitmiðaðar setningar.
  • Passa upp á stafsetningarvillur.

Kynningarbréf

Kynningarbréf er persónulegra en ferilskráin, sem er formföst. Vel uppbyggt kynningarbréf þarf að vera grípandi og vekja áhuga á að skoða viðkomandi nánar.

Kynningarbréf vegna ákveðins starfs byrjar á stuttri kynningu, t.d. af hverju verið er að sækja um starfið og hvað það er við starfið sem vakti áhuga á því. Í kynningarbréfi er tekið fram hvernig umsækjandi mætir þeim hæfniskröfum sem gerðar eru fyrir starfið og hvernig hann sér sjálfan sig passa í starfið með tilliti til fyrri reynslu.

Bréfið endar á persónulegri nótum um að mikill áhugi sé fyrir hendi og ítrekið hvar er hægt að á í umsækjanda í síma og netfangi.

Gott er að hafa kynningarbréf ekki lengra en sem nemur hálfri til einni blaðsíðu. Munið í upphafi bréfs að ávarpa þann sem er titlaður fyrir starfinu og hafa nafn ykkar og tengslaupplýsingar til staðar.

Varast skal:

  • Of löng bréf
  • Ítarlegar lýsingar á mannkostum ykkar, þá er aldrei hægt að meta á pappír.
  • Útlistun á ættartali. Það er í lagi að tiltaka fjölskylduaðstæður, en upptalningar á föður, móður, systkinum  o.s.frv. er ofaukið.
  • Að endurskrifa ferilskrána í samfelldum texta.

Atvinnuviðtal

Áður en farið er í atvinnuviðtal er gott að hafa eftirfarandi atriði í huga:

  • Hver er ég?
  • Hvaða eiginleika / hæfileika hef ég?
  • Hverjir eru styrkleikar og veikleikar mínir?
  • Hvað vil ég? Hvernig passar starfið við framtíðarmarkmiðin?
  • Hverjar eru hæfniskröfur fyrir starfið?
  • Hvernig passar menntun og reynsla mín í starfið?
  • Veit ég eitthvað um fyrirtækið? Skoða vefsíðu fyrirtækisins.
  • Hvert á ég að mæta og klukkan hvað?
  • Er klæðnaður minn viðeigandi?
  • Jákvætt hugarfar og bros ættu ávallt að vera með í för.

Annað í „Ertu að leita að starfi?“

Nánari upplýsingar