Þjóðarpúlsinn

Traust til margra stofnana á uppleið

Gallup hefur kannað traust almennings til nokkurra stofnana og embætta frá árinu 1993 og hér eru birtar niðurstöður um traust til fimmtán stofnana og embætta. Í síðustu mælingu sem gerð var í febrúar 2010, voru breytingar á trausti til stofnana í flestum tilvikum ekki miklar, með einhverjum undantekningum þó. Að þessu sinni eru flestar stofnanir á uppleið þó traust mælist nú mun minna til Þjóðkirkjunnar og borgarstjórnar Reykjavíkur. Einnig hefur hlutfall þeirra sem ber mikið traust til lögreglunnar og Alþingis lækkað aðeins.
Landhelgisgæslan mælist með mest traust meðal þjóðarinnar af þeim stofnunum og embættum sem mældar voru, en hún nýtur trausts 89% svarenda. Tæplega 80% segjast nú bera mikið traust til lögreglunnar og Háskóli Íslands kemur þar á eftir en 76% bera mikið traust til hans. Traust til lögreglunnar og Háskóla Íslands breytist lítið frá því í fyrra. Traust til heilbrigðiskerfisins eykst um fjögur prósentustig milli ára og mælist nú 74%. Veruleg aukning er á trausti til embættis sérstaks saksóknara, en nær 69% segjast treysta embættinu nú samanborið við 57% í fyrra. Að sama skapi eykst traust til ríkissaksóknara um rúmlega 12 prósentustig milli ára og nýtur hann nú trausts 41% þjóðarinnar. Traust til umboðsmanns Alþingis eykst lítillega, eða um 3 prósentustig en rúmlega helmingur þjóðarinnar ber mikið traust til hans. Tæplega 41% ber mikið traust til embættis ríkissáttasemjara. Traust til dómskerfisins eykst nokkuð milli ára, en um 37% bera mikið traust til þess nú. Traust til þjóðkirkjunnar minnkar nokkuð milli ára en einungis þriðjungur treystir henni nú, samanborið við um 40% í fyrra. Traust til Seðlabankans eykst áfram milli mælinga en fimmtungur landsmanna bera mikið traust til hans nú. Traust til borgarstjórnar Reykjavíkur minnkar nokkuð milli mælinga en um 16% bera traust til borgarstjórnar. Ekki eru miklar breytingar á trausti til Alþingis og Fjármálaeftirlitsins frá því fyrra, um 12% treysta FME og um 11% Alþingi. Bankakerfið mælist með minnst traust þótt fjölgi aðeins í þeim hópi sem bera mikið traust til þess, en í honum eru 6% svarenda.